На денешната 165-та седница, Државната изборна комисија (ДИК) едногласно ги усвои одлуките за подготовка на повторените локални избори што ќе се одржат на 11 јануари 2026 година во општините Гостивар, Врапчиште, Центар Жупа и Маврово Ростуше. Исто така, на седницата беше усвоен и конечниот извештај за локалните избори во 2025 година, кој ќе биде доставен до Собранието.
– Овој извештај го доставуваме како и секогаш, после сите избори согласно Изборниот законик до Собранието и извештајот јавно се објавува, ги содржи потребните податоци за спроведените изборни дејствија од страна на Државната изборна комисија, преземените активности хронолошки се подредени, надлежностите и сè она што беше преземено од наша страна за време на изборниот процес.
Исто така, ги содржи и сите финансиски аспекти во врска со спроведувањето на изборите, трошоците кои ги имаше ДИК кои се наменети за целокупното работење и целокупните трошоци за сите изборни дејствија во врска со спроведените Локални избори, рече претседателот на ДИК, Борис Кондарко. На седницата беа усвоени и одлуки за формирање на работна група задолжена за подготовка, проверка и достава на изборниот материјал до општинските изборни комисии. Групата ќе има овластувања слични на оние за локалните избори, но во помал формат и со ангажман ограничен на еден месец, до крајот на јануари 2026 година.
– Ние донесовме ваква одлука и во пресрет на локалните избори 2025 година. Со оглед дека важноста на оваа одлука е до 31.12, годинава, а поради повторените локални избори во јануари 2026-та, мораме да ги ангажираме овие лица кои ќе ги извршуваат истите функции, ќе ги имаат истите надлежности како и за локалните избори и на овие повторени избори. Нивниот ангажман ќе биде ограничен само на еден месец за време на спроведувањето на повторените избори значи во јануари 2026-та година заклучно со 31-ви јануари, рече Кондарко.
Дополнително, ДИК формира и меѓуинституционално координативно тело за ИКТ и безбедносни прашања, кое ќе вклучува експерти од ИТ и безбедност за непречено одржување на изборите. – Тие лица веќе беа ангажирани за локалните избори и професионално и стручно си ја извршија нивната работа така што овие лица се неопходно потребни, ги задржуваме со ограничен мандат со донесувањето на оваа одлука за да имаат формално пристап и овластување да ги извршуваат изборните дејствија од ИТ областа на работењето на ДИК, рече Кондарко. ДИК продолжува со редовните законски активности согласно роковникот за организација и подготовка на сите изборни дејствија за изборите на 11 јануари 2026 година.
