Народната банка соопшти нови податоци за состојбата со надворешниот долг, надворешните побарувања и меѓународната инвестициска позиција на државата на крајот од третиот квартал во 2025 година.
– На 30.9.2025 година, нето надворешниот долг изнесува 4.494 милиони евра (или 27,1% од проектираниот БДП). Нето надворешниот долг на земјата, во третиот квартал од 2025 година, е намален за 106 милиони евра, или за 2,3%. Од аспект на структурата, приватниот нето-долг и натаму има поголемо учество во вкупниот нето-долг со 67%, се наведува во соопштението од Народната банка.
Дополнително, во текот на третиот квартал годинава е забележано и подобрување на нето меѓународната инвестициска позиција. Негативната МИП е намалена за 250 милиони евра и на крајот од септември изнесува 8.738 милиони евра, што е еквивалентно на 52,7% од проектираниот бруто-домашен производ за 2025 година.
