Украинските беспилотни летала извршија напад длабоко на руска територија, погодувајќи ја рафинеријата за нафта Сизран во регионот Самара. Нападот бил насочен кон единствената единица за примарна преработка на нафта во фабриката, која е клучен снабдувач на дизел за рускиот домашен пазар и окупаторските сили, пишува „Киев пост“.
Според извештаите, украинските беспилотни летала ја погодиле единицата ELOU-AVT-6 – постројка за електрична десалинизација и атмосферско-вакуумска дестилација со проектиран капацитет од 6 милиони тони сурова нафта годишно. Украинскиот одбранбен портал Militarny истакнува дека рафинеријата Сизран има само една таква единица. Доколку таа е сериозно оштетена, тоа би можело да доведе до целосно исклучување на постројката.
Рафинеријата „Сизран“, дел од „Самарска група“ на „Роснефт“, произведува околу 2,5 милиони тони дизел годишно, што ја прави клучен производител на гориво за регионот Самара и поширокиот регион Волга. Ова не е прв напад врз објектот. Од почетокот на 2025 година, украинските беспилотни летала веќе ги таргетираа производствените погони, вклучувајќи ја и истата единица ELOU-AVT-6.
На каналот „Ексиленова+“ беше објавено видео од моментот на ударот, во кое се наведува дека нападот го извршил Првиот центар на украинските сили за беспилотни системи. Освен рафинеријата, наводно, беспилотните летала ја погодиле и градската електрична трафостаница, веројатно 220-киловолтната трафостаница „Сизранскаја“.
На руските социјални медиуми се појавија извештаи за привремени прекини на електричната енергија и греењето во станбени области. Додека воздушните напади траеја повеќе од седум часа, руското Министерство за одбрана тврдеше дека соборило 12 украински дронови над регионот, без да спомене каква било пријавена штета на теренот.
