ВМРО-ДПМНЕ во сабота ќе го одржи 18. партиски конгрес, овојпат во Кавадарци, на кој делегатите формално ќе избираат претседател на партијата – но без вистинска трка. Единствен кандидат е актуелниот лидер и премиер Христијан Мицкоски, кој веќе најави дека ова ќе биде неговиот последен мандат на чело на ВМРО-ДПМНЕ, доколку ја добие поддршката од делегатите.
Според најавите, на конгресот се очекува присуство на околу 860 делегати и околу 1.800 гости. Освен изборот на претседател, ќе бидат избрани и Статутарна комисија и Комисија за надзор на финансиското работење, тела кои формално го заокружуваат внатрепартискиот архитектон на новиот мандат. Од Кавадарци треба да стигнат и неколку стратешки документи, со кои партијата сака да ја дефинира својата иднина како владејачка структура.
Клучен дел од политичката сценографија е документот „Стратегија Македонија 2030“, кој, според најавите, ќе биде усвоен на конгресот и претставен како рамка во која ќе се движи владејачката партија наредните години. Главните столбови од стратегијата – економија, инфраструктура, енергетика, образовни и здравствени реформи – треба да бидат промовирани токму во сабота, како порака дека ВМРО-ДПМНЕ не планира само партиско, туку и државно „редизајнирање“ до крајот на деценијата.
Во интервју за „360 степени“ на МРТ, Мицкоски веќе најави дека новиот мандат како претседател на ВМРО-ДПМНЕ го гледа како „последен“ и дека нема намера да поддржи промена на статутарното ограничување за бројот на последователни мандати за лидерот. „ВМРО-ДПМНЕ ми е како трето дете, но ова ќе биде мој последен мандат, доколку делегатите ми ја дадат довербата“, рече тој, додавајќи дека на конгресот ќе има и кадровски промени и нови акценти во партиското функционирање.
Фактот дека Мицкоски оди на конгрес без противкандидат го потврдува неговиот доминантен статус во партијата, но отвора и прашања за внатрепартискиот плурализам. Најавите за „последен мандат“ и за стратегија до 2030 година практично значат дека ВМРО-ДПМНЕ формално влегува во период во кој треба истовремено да владее со државата и да си ја подготвува сопствената „постмицкоска“ ера. Како ќе изгледа тој баланс – меѓу концентрирана лидерска моќ и потребата од поширока внатрешна дебата – ќе се чита и од кадровските и програмските потези што ќе бидат објавени во Кавадарци
За јавноста, саботниот конгрес е тест не само за партискиот рејтинг, туку и за начинот на кој владејачката ВМРО-ДПМНЕ ќе се обиде да ја претвори изборната победа во долгорочен политички проект. Одговорот на тоа прашање, барем симболично, ќе започне од салата во Кавадарци – каде што делегатите, без вистинска дилема за изборот на лидер, ќе треба да одлучат каква партија и каква „Македонија 2030“ потпишуваат.
