Четириесет и четиригодишен тетовец е лишен од слобода рано утрово, откако полициска патрола во неговото возило открила седум илегални мигранти од Египет.
Возилото „фолксваген шаран“ било запрено кај наплатната рампа Романовце. Возачот признал дека турата била од Гевгелија до Куманово, а патниците, меѓу кои и 17-годишник, немале никакви документи за идентификација.
Возачот и мигрантите се приведени, а по документирање на случајот ќе биде поднесен соодветен поднесок.
„На 30.11.2025 година, околу 02:10 часот, на автопатот Скопје–Куманово, кај наплатната рампа Романовце, при вршење мото-патролна дејност од страна на полициски службеници од Мобилната единица за безбедност на сообраќајот на патиштата при Секторот за сообраќајни работи, било сопрено патничко моторно возило „фолксваген шаран“ со тетовски регистарски ознаки, управувано од С.И.(44) од Тетово. При контрола во возилото биле забележани лица кои при легитимирање немале никакви документи за идентификација. Во разговор со возачот, тој посочил дека требало да ги превезе лицата од Гевгелија до Куманово. Во возилото се превезувале седум лица, сите по нивен исказ државјани на Египет, на возраст од 17 до 52 години. Возачот и мигрантите се лишени од слобода. По целосно документирање на случајот ќе биде поднесен соодветен поднесок.“
