Во Центарот за одгледување и дресура на кучиња (ЦОДК) единствениот специјализиран државен центар во кој се одгледуваат, дресираат и редресираат службени кучиња за потребите на Армијата и Министерството за внатрешни работи веќе повеќе од еден месец владее мрак, студ и целосна нефункционалност.
„Кучињата ги храниме на свеќи, а ноќе седиме со капути. Нема греење, нема светло, нема услови. Ова е центар кој треба да подготвува животни за најсложени задачи, а ние работиме како пред 100 години,“ реагираат вработени од двата ресори, кои побараа да останат анонимни.
Овој центар, кој е клучен за подготовка на кучиња за детекција на дрога, експлозиви, трагање по исчезнати лица и други високо ризични операции, се наоѓа во касарната во Ѓорче Петров. Но, иако има критична улога во безбедносниот систем, повеќе од еден месец работи без електрична енергија.
Според информации за 24 Инфо, вработените дресери, припадници на АРМ и МВР, работат во услови кои ги опишуваат како нехумани. Без струја, храната за кучињата се подготвува со помош на батериски светилки, а дел од работниот процес вклучително и ноќната смена се изведува со свеќи.
Тие велат дека со месеци предупредуваат, но проблемот не се решава. Прекинот на струја ја довел во прашање безбедноста на животните, нормалното одржување на тренинзи, па дури и основното функционирање на Центарот.
24 Инфо испрати прашања до Министерството за одбрана и до Министерството за внатрешни работи.
Од Министерството за одбрана одговорија дека двете институции заедно работат на надминување на проблемот:
„Министерството за одбрана заедно со Министерството за внатрешни работи работат на отстранување на проблемот и во текот на следната недела работата на Центарот ќе биде нормализирана. Би сакале да напоменеме дека не е загрозена ниту безбедноста на вработените од Армијата ниту на кучињата кои се дел од овој Центар.“
Од Министерството за внатрешни работи, до објавување на текстот, не добивме одговор.
