Некои луѓе спијат на страна, други склопчени или „распослани“, а голем дел на стомак. Иако спиењето на грб за некои изгледа неприродно, бројни истражувања покажуваат дека токму оваа положба може да биде едноставно решение за различни проблеми поврзани со сонот и здравјето.
Како што пишува „Хелт лајн“, спиењето на грб може да помогне во:
- правилно и рамно држење на ‘рбетот,
- намалување на силни главоболки,
- намалување на притисокот врз градниот кош,
- ублажување на затнувањето на синусите,
- спречување на брчки и иритација на лицето поради помал контакт со перница.
Кога станува збор за новороденчиња, Американската академија за педијатрија препорачува бебињата да спијат на грб за да се намали ризикот од „синдром на ненадејна смрт на доенчиња“ (СИДС).
Истражувањата дополнително укажуваат дека спиењето на грб или на страна кај возрасните е поврзано со помалку болки во грбот, за разлика од спиењето на стомак, кое го оптоварува ‘рбетот.
И покрај бројните придобивки, ова не е најпопуларната поза за спиење. Повеќето млади луѓе се навикнуваат да спијат на страна, а истото го покажуваат и европските податоци – повеќе од 60 отсто од возрасните во Европа спијат токму во оваа положба.
