Утрово од 8.30 часот магистралниот пат Куманово–Крива Паланка е во целосен прекин поради случена сообраќајна несреќа, информира Автомото сојузот на Македонија (АМСМ).
Од АМСМ потсетуваат и дека на 28 ноември 2025 година, во 17.45 часот, на регионалниот пат Р1105, на делницата од селото Јосифово до селото Пирава, повторно е надојдена Калковска Река по обилните врнежи од дожд. Поради тоа, сообраќајот е пренасочен за сите видови возила кон магистралата А1, од селото Удово кон селото Марвинци.
И покрај овие прекини, сообраќајот на останатите државни патишта се одвива непречено, по влажни коловози.
Од 15 ноември 2025 година е во сила законската обврска за задолжително поседување зимска опрема во возилата, без оглед на временските услови. Обврската трае до 15 март 2026 година.
Интензитетот на сообраќај на патните правци надвор од градските средини е умерен, а на граничните премини од македонска страна нема подолги задржувања за влез или излез од државата.
АМСМ апелира за прилагодена брзина, почитување на поставената сигнализација и зголемено внимание, особено на патиштата низ котлините, речните долини и клисурите, каде што постои ризик од појава на одрони. Најкритични делници се Катланово–Велес, Маврово–Дебар–Струга, Виница–Берово и Кочани–Делчево.
