Вечерва започна големата акција за чистење на главниот град „72 часа чисто Скопје“ од платото пред Спортскиот центар „Борис Трајковски“.
На терен се ангажирани десетици камиони, цистерни и механизација, подготвени да интервенираат низ сите делови на градот.
Градоначалникот на Општина Центар, Горан Герасимовски, пристигна на акцијата со својот „Фиат 500“, додека новиот градоначалник на Скопје, Орце Ѓорѓиевски, кој денеска ја презеде функцијата, потенцираше дека ова претставува прв чекор кон враќање на достоинствениот и уреден изглед на градот.
– Во наредните 72 часа ќе дадеме сè од себе Скопје да блесне онака како што им ветив на скопјани. Ќе бидат вклучени екипи од јавните претпријатија, како и поддршка од повеќе општини од внатрешноста. После долго време, повторно ќе се перат улиците, плоштадот и кејот ќе се исчистат темелно, а јавните претпријатија ќе се вратат во нормална функција, рече Ѓорѓиевски.
