Европската комисија го објави својот најнов извештај за напредокот на Македонија, во кој се нотира алармантен застој во клучните области. Во поглавјето „Фундаменти“, земјата доби оценка „нула напредок“ во делот „Судство и фундаментални права“ и „нула напредок“ во „Борбата против корупцијата“.
Извештајот нагласува дека „корупцијата останува распространета во многу области и претставува сериозна загриженост“. Дополнително, кредибилитетот на Државната комисија за спречување на корупција (ДКСК) е доведен во прашање по подигнувањето обвинение и оставката на нејзината претседателка. Комисијата забележува дека случаите на корупција на високо ниво „често доживуваат одложувања, застаруваат или резултираат со минимални казни“.
Во однос на судството, извештајот заклучува дека независноста е „поткопана од мешање и притисок од другите гранки на власта“.
Во исто време, Комисијата потсетува дека отворањето на првиот кластер од преговорите зависи од усвојувањето на уставните измени. Во извештајот се констатира дека „не се направени обиди“ за усвојување на измените за вклучување на граѓаните кои се дел од други народи, како што се Бугарите, во Уставот.
Политичката поларизација во Собранието, исто така, го одложи усвојувањето на важни реформи.
