Невидена сцена се случила на детско игралиште во скопската населба Капиштец, каде 10-годишно дете било каснато од глушец додека се играло со други деца, објави телевизија Сител. Инцидентот резултираше со раскрвавена рака кај детето и доаѓа во време кога Скопје се соочува со сериозна криза со ѓубрето, а ЈП „Комунална хигиена“ е под истрага.
Според извештајот, детето било нападнато од глодарот среде игралиште, што претставува директна последица на лошата хигиена и преполните контејнери кои со денови ги преплавуваат скопските улици и населби. Градот буквално се претвора во депонија, а граѓаните стравуваат од ширење на зарази.
Во отсуство на редовни услуги од страна на „Комунална хигиена“, градоначалниците на дел од скопските општини веќе почнаа да организираат акции за чистење со сопствена механизација, обидувајќи се барем делумно да ја санираат ситуацијата.
Во меѓувреме, директорот на ЈП „Комунална хигиена“ е недостапен за јавноста, а институционалната криза кулминираше со акцијата на полицијата и обвинителството, кои влегоа во просториите на претпријатието за истрага за можни злоупотреби.
Инцидентот со каснатото дете е алармантен сигнал за сериозноста на ситуацијата и за итната потреба од решавање на кризата со отпадот во Скопје.
