Овој рецепт е совршен за сите оние кои живеат брзо и не сакаат да се откажат од домашната пица.
Ќе се согласите дека нема некој кој не сака пица. Вкусна, мека и топла, таа често е јадење на семејните трпези и кај нас. Кога немате ништо подготвено за вечера, а гостите само што не стигнале, овој рецепт е вистинско решение. А вкусот пред сè го дава вистинското тесто, дури потоа додатоците.
Потребни соостојки: 250 мл јогурт (што е можно погуст), 250 мл меко брашно, 1 јајце со средна големина, 1 лажичка прашок за пециво (рамна лажичка), 1/2 лажичка сол, 1 лажица маслиново масло (за тестото) и малку за премачкување на плехот;
Подготовка: Вклучете ја рерната и загрејте ја на 220 степени Целзиусови. Ставете го плехот во рерна за да се загрее.
Истурете го јогуртот во поголем сад, додадете го јајцето и маслиновото масло. Изматете ги кратко со вилушка или жица за да се соединат.
Во истиот сад додадете брашно, прашок за пециво и сол.
Мешајте ги сите состојки со лажица или силиконска шпатула додека не се соединат во мазно, но сепак доста меко и малку лепливо тесто. Не месете предолго. Доволно е само да нема суво брашно.
Извадете го загреаниот плех од рерна. Обложете го со хартија за печење, а потоа истурете го тестото директно врз хартијата.
Со влажни раце или лажица намастена со масло, нежно распоредете го тестото по целиот плех за печење во што е можно потенок слој. Не грижете се ако не е совршено тркалезен, важно е да е тенок.
Веднаш нанесете го вашиот омилен доматен сос, наросете со половина од сирењето, а потоа наредете ги останатите состојки по желба (шунка, печурки, маслинки, кромид…). На крајот, наросете со остатокот од сирењето и ориганото.
Ставете ја пицата во загреаната рерна и печете околу 10 до 15 минути, или додека рабовите на тестото не поруменат, а сирењето убаво не се стопи и не добие златна боја. Времето на печење може да варира во зависност од дебелината на тестото и јачината на вашата рерна.
Ова тесто е без квасец, па затоа нема да нарасне како класичното тесто за пица. Ќе биде повеќе како крцкава, тенка кора што е идеална за брзи оброци. Пријатно!
