Косово е примено во Европскиот економски и социјален комитет, објави Косовската радио-телевизија (РТК).
Ова е првата европска институција што го прифати Косово како членка, иако сè уште нема статус на земја-кандидат за членство, забележува јавниот медиум.
Косово долго време сака да се приклучи во ЕУ, но останува единствената земја на Западен Балкан што сè уште нема статус на земја-кандидат за членство. Косово аплицираше за членство во ЕУ на крајот на 2022 година, но неговата кандидатура е во застој поради недостиг на консензус меѓу 27-те земји-членки, бидејќи пет земји од ЕУ – Кипар, Грција, Романија, Словачка и Шпанија – не ја признаваат независноста на Косово.
Европскиот економски и социјален комитет минатата година започна пилот-фаза од проект со земјите-кандидатки, но Косово не беше вклучено во тоа време, бидејќи немаше статус на земја-кандидат за членство, потсети Косовската радиотелевизија.
„По консултациите со Европската комисија и други релевантни засегнати страни, беше одлучено да се отвори втората фаза од иницијативата за Косово како потенцијален кандидат за членство“, соопшти Европскиот економски и социјален комитет, цитиран од РТК.
Европскиот економски и социјален комитет е советодавно тело на Европската Унија, кое е составено од претставници на здруженија на работодавачи, синдикати и организации на граѓанското општество, забележува медиумот. Неговата цел е да обедини различни економски и социјални интересни групи со цел да придонесе за развојот на единствениот пазар на ЕУ.
