Пред само дваесет дена Здружението на новинари на Македонија (ЗНМ) изрази сериозна загриженост поради недолично и непрофесионално однесување кон новинарки за време на јавен настан во Скопје, на кој присуствувал министерот за здравство Азир Алиу и одговорното лице за протокол од министерството.
Тогаш инцидентот настанал кога група новинари побарале изјави, а вработена од протоколот им одговорила дека тоа не е можно, при што на една новинарка ѝ се обратила со навредливи зборови: „Невоспитана, дрска и најбезобразна новинарка“.
Денес, ЗНМ повторно изрази загриженост поради нов случај на ограничување на присуството на медиумите при посетата на Клиниката за пулмологија и алергологија, каде што единствено била повикана агенцијата МИА, додека останатите медиуми не биле официјално поканети. Според ЗНМ, ова претставува дискриминација и создава сомнеж за прикривање информации од јавен интерес.
Организацијата потсетува дека институциите се должни да обезбедат транспарентност и еднаков пристап до информации за сите новинари и повикува на итна ревизија на практиките на Министерството за здравство за да се заштити правото на информирање и да се одржи довербата во институциите.
