Врз основа на собраните изјави, службени извештаи и пријавата на Комисијата за млади категории при ФФМ, Првостепената дисциплинска комисија отвори и заврши повеќе дисциплински постапки согласно Дисциплинскиот правилник.
Најсериозниот инцидент се случи на крајот од натпреварот, кога играчот на ФК Шкупи 1927 со број 9, Абдуљи Леарт, физички нападна противнички фудбалер и му нанесе сериозни повреди. Согласно член 43 став 2 од Дисциплинскиот правилник, за физички напад со потешки последици, кон него е изречена најстрога санкција – исклучување од фудбалската организација.
Во инцидентот учествуваа и играчите на ФК Шкупи 1927 – Рамадани Ибрахим (бр. 5) и Новобрдалија Амар (бр. 30), кои исто така извршија физички напад. Против нив е поведена постапка согласно член 43 став 1, по што им е изречена забрана за настап во траење од три месеци.
Дополнително, играчот на ФК Брегалница 2008 со број 4, Гоцев Симеон, реагирајќи на нападот се впушти во груба игра и пречекорена самозаштита. Неговата постапка е квалификувана согласно член 40 од ДП, за што му е изречена забрана за играње на четири натпревари. Комисијата утврди и организаторска и колективна одговорност на двата клуба.
Против ФК Шкупи 1927 е поведена дисциплинска постапка согласно член 51 од ДП, поради физички напад од родители/навивачи врз противнички играчи, што претставува тежок прекршок од страна на гледачи. Согласно член 29, санкцијата се однесува на екипата „помлади пионери“, која го сторила прекршокот.
Против ФК Брегалница 2008 е поведена дисциплинска постапка согласно член 48 од ДП, поради слаба организација и пропуст во обезбедувањето. И оваа постапка, согласно член 29, се однесува на екипата „помлади пионери“, која била домаќин на натпреварот.
Исто така, против Алејса Виши, координатор за млади категории на ФК Шкупи 1927, е поведена дисциплинска постапка поради внесување на лажни информации во Комет системот на ФФМ, со што како шеф на стручен штаб и кондициски тренер биле заведени лица кои воопшто не присуствувале на натпреварот Брегалница – Шкупи 1927.
