Шпанскиот премиер Педро Санчез објави дека следниот вторник Владата ќе прогласи вонредна состојба во областите погодени од шумски пожари во регионот Екстремадура, особено околу градот Ла Грања во покраината Касерес.
Санчез рече дека, откако ќе се изгаснат пожарите и ќе се процени економската штета, државата ќе обезбеди средства за реконструкција на уништените области, пренесува EFE.
„Државата сме сите ние“, рече Санчез и ја нагласи улогата на армијата (UME), цивилната заштита и шумските служби, кои, како што изјави, „беа на располагање на регионалната влада на Екстремадура од самиот почеток“.
Тој, исто така, потсети дека, по ерупцијата на вулканот на Ла Палма во 2021 година, беше договорено да се зајакне националниот систем за цивилна заштита, кој, додаде, сега се спроведува.
Санчез истакна дека е активиран и европскиот механизам за цивилна заштита, што овозможува распоредување на ресурси од други делови на Европа.
„Ова покажува дека, во услови на криза од ваков карактер, институционалната лојалност, волјата за соработка и солидарноста меѓу териториите, а исто така и меѓу земјите, се од фундаментално значење. Тие се приоритет за прво да се локализираат, а потоа и да се изгаснат овие пожари“, рече тој.
Претседателката на Екстремадура, Марија Гвардиола, повика на реформа на законите за животна средина, кои ги опиша како „премногу ригидни и оддалечени од реалноста на руралните средини“. Таа, исто така, повика на поголеми инвестиции во спречување на пожари.
