Голем шумски пожар избувна во близина на селото Лозаново, општина Крива Паланка, а градот се соочува со една од најголемите огнени стихији во последните неколку години. Градоначалникот Сашко Митовски преку својот фејсбук профил информираше за сериозноста на ситуацијата и упати јавен апел за помош.
„Градот се наоѓа под најголема стихија, огнена стихија во последните неколку години. Апелирам и алармирам за смиреност, но во истиот момент апелирам на помош на сите соседни општини, државна помош вклучувајќи ја целовкупната државна механизација. Во опасност се наоѓа директно населено место Лозаново“, објави Митовски.
Пожарот се шири со голема брзина поради високите температури и ветерот, а во гаснењето се вклучени екипи на Територијалната противпожарна единица и локалното население. Општинските власти се во координација со Центарот за управување со кризи и другите надлежни институции.
Градоначалникот предупредува дека е загрозена безбедноста на жителите и повикува на максимална мобилизација на сите расположливи ресурси за да се спречи проширување на огнената стихија кон населените места.
Ситуацијата се следи со зголемено внимание, а се очекува во текот на денот да пристигне и државна помош.
