Скопје попладнево е обвиено во густ чад, откако пожарот што избувна вчера во близина на граничниот премин Блаце не е ставен под контрола и продолжува да се шири со голема брзина. Силниот ветер дополнително го отежнува гаснењето и ја зголемува заканата од проширување кон населени места.
Најзагрозени се северниот и западниот дел на градот, каде граѓаните пријавуваат неподнослива миризба на горење, тешкотии со дишењето и намалена видливост.
Според информациите од терен, пожарот зафатил голема површина од ниска вегетација и делови од шума, а на неколку локации огнот се доближува опасно близу до куќи и објекти.
Противпожарните екипи, заедно со единиците на Центарот за управување со кризи и поддршка од хеликоптерската служба, се обидуваат да го локализираат пожарот, но неповолните временски услови ја отежнуваат битката со огнената стихија.
Од надлежните институции е упатен апел до граѓаните да ги избегнуваат погодените подрачја, да ги држат прозорците затворени и да не излегуваат без потреба, поради силно загадување на воздухот.
Како дополнителна мерка, целосно е затворен граничниот премин Блаце, додека трае интервенцијата на терен и додека не се создадат услови за безбедно движење.
