Изјава на Сашо Јорданоски, Комисија за земјоделство на ОО СДСМ-Прилеп
Пукната цевка во хидросистемот кој го наводнува плодното Прилепско поле, е причина што повеќе од месец и пол огромни површини засадени со тутун се наоѓаат пред сушење.
Прекинот со водоснабдување на земјоделските површини настана уште во периодот на расадување на тутунот. Оттогаш па до денес, десетици хектари засадени со тутун но и со градинарски производи, немаат видено капка вода.
Срамота е во 21 век, во ерата на секојдневен напредок на технологијата, дефект на водоводна цевка да го сотре тутунот во најтутунарскиот регион во државата.
Надлежните од „Прилепско поле“ и „Водостопанство“ креваат рамена и немаат одговор дали и кога дефектот ќе биде отстранет.
Нема ништо од ветената грижа за тутунопроизводителите од страна на министерот за земјоделство Цветан Трипуновски, а од пратениците од власта и градоначалникот Борче Јовчески – ни трага ни глас.
Прилепските тутунопроизводители се заборавени и препуштени сами на себе.
Господа од власта, излезете од вашите удобни кабинети и решете го проблемот кој се заканува да го пеплоса родот од годинешната тутунска реколта во прилепскиот регион.
Во спротивно, вашата незаинтересираност и неспособност да ги решавате проблемите на граѓаните, ќе остави без парче леб огромен број семејства од општина Прилеп на кои тутунот им е единствен извор на егзистенција.
