Обвинителите кои ја водат истрагата за кочанската трагедија го информираа колегиумот за досега преземените чекори, методите на истражување и стручните аспекти што ги имаат предвид во постапката.
Стручниот колегиум на Јавното обвинителство ја потврди својата целосна поддршка за досегашната работа на истражниот тим. Обвинителите паралелно спроведуваат истражна и предистражна постапка со широка опфатеност, со цел да се утврди целосната одговорност за трагичниот настан. Од ЈО нагласуваат дека сите нивни капацитети се ставени на располагање за ефикасно завршување на истрагата.
Во меѓувреме, со смртта на 60-та жртва од пожарот, која воедно беше еден од осомничените во случајот, обвинителството најави дека по прибавување на официјалната документација ќе донесе наредба за запирање на истражната постапка за него.
