Вкупно 12 лица повредени во тешката несреќа што се случи ноќеска во дискотеката во Кочани се пренесени со авион CASA C-295 на српската армија од Скопје во Белград, каде што ќе бидат хоспитализирани. Девет од нив се примени во Ургентниот центар на Србија, додека тројца се згрижени во Воено-медицинската академија (ВМА).
Претходно, уште две лица беа транспортирани во Воената болница Ниш и Клиничкиот центар Ниш.
Во Македонија пристигна и медицински тим составен од четворица лекари и четворица медицински техничари за да помогне во евакуацијата на повредените. Двајца лекари, меѓу кои пластичен хирург и анестезиолог, како и еден медицински техничар, ќе останат во земјата за дополнителна поддршка.
Турција исто така испрати помош, при што авиони на турското Министерство за здравство и Министерството за одбрана презедоа девет повредени лица. Првиот авион транспортираше тројца повредени во Истанбул, каде што беа сместени во болницата „Башакшехир Чам и Сакура“, специјализирана за третман на изгореници. Вториот авион пренесе уште шест лица во болницата „Билкент“ во Анкара, каде што ќе добијат понатамошна специјализирана нега.
