Во време кога земјата се соочува со недостиг на медицински сестри и техничари, нивното отпуштање е несериозно и нехумано, предупреди денеска Гордана Бешлиовска, претседателка на Унијата што ја предводи Здружението „За нас“.
Таа на прес-конференција побара итно вработување на медицинските сестри и техничари кои со години работат без здравствено и пензиско осигурување. Според неа, 120 нивни колеги, кои шест или седум години работеле со договор на дело, останале без работа откако Општата болница Прилеп еднострано им ги раскинала договорите, а на нивно место дошле нови кадри.
„Некои од медицинските сестри се приморани да бараат работа по бутици. Оваа професија се работи од љубов кон животот и пациентите, а нејзиното запоставување ќе остави катастрофални последици врз здравствениот систем“, истакна Бешлиовска.
Таа апелираше да престане поделбата на медицинските сестри по политички, образовни, полови, возрасни или етнички линии. Според неа, критериумите за нивната работа треба да бидат исклучиво професионализмот и емпатијата.
„Ако нацијата е богатство на државата, тогаш медицинските сестри се богатство на нацијата. Време е да се најде системско решение во интерес на сите“, порача Бешлиовска.
