ЕСМ бара да се зголеми цената на парното. Минатиот месец поднеле барање до регулаторна со образложение дека имаат поголеми трошоци за гас.
„Со поднесеното барање Друштвото бара зголемување на трошокот за гориво за 2024 година во износ од 12,92 проценти“, пишува во документот.
Регулаторната комисија за енергетика во наредните денови ќе закаже состанок за да се разгледа барањето на ЕСМ. Оттаму велат одлука ќе има набрзо.
Од ЕСМ за Сител велат дека „е настаната значителна промена на околностите и елементите што постоеле во времето на одобрување на регулираниот максимален приход и цената на топлинската енергија, односно зголемена е цената на природен гас во тек на грејната сезона“.
Опозициската СДСМ побара ЕСМ да го повлече барањето.
„Поскапување на парното би било уште еден удар врз стандардот на граѓаните. Од друга страна е лошо и во однос на загадувањето на воздухот. Власта треба да ја намали цената на парното за да ги стимулира граѓаните да се вратат и повеќе да се приклучат на парно“ – изјави Богданка Кузеска, портпаролка на СДСМ.
Парното лани во август поевтини за околу 3%.
На системот се приклучени околу 63 илјади домаќинства.
