Француската полиција заплени повеќе од два тони кокаин во вредност од околу 130 милиони евра и уапси двајца мажи во пристаништето на градот Авр, соопштија светските агенции повикувајќи се на официјални извори.
Оваа акција претставува дел од пошироките напори на Франција и другите европски земји за спречување на шверцот на наркотици и за ограничување на активностите на криминалните банди. Француските власти предупредуваат на зголемениот ризик од смртоносни пресметки меѓу нарко групите во европските градови.
Минатата година Европската комисија започна кампања заедно со пристанишните власти ширум Европа, со цел засилување на контролата и спречување на шверцот на дрога преку големите пристаништа.
Францускиот премиер Франсоа Бајру и министерот за внатрешни работи Бруно Риотајо најавија построги мерки за борба против организираниот криминал.
– Со секој изминат ден ја засилуваме војната против трговијата со дрога, благодарение на исклучителната работа на нашите офицери – изјави Риотајо на платформата „Икс“ и им честиташе на припадниците на полицијата за успешната операција во Авр.
