Основното јавно обвинителство во Штип поднесе обвинителен акт против 33-годишен маж осомничен за убиство, казниво според член 123 став 2 точка 2 од Кривичниот законик.
Според истрагата, на 1 ноември, обвинетиот со умисла ја лишил од живот својата вонбрачна партнерка за време на семејно насилство. Двајцата се сретнале пред нејзиниот дом и заминале во напуштен објект на ЈП Исар, каде што разговорот за нивните проблеми ескалирал во расправија.
Обвинетиот ја нападнал жртвата физички, удирајќи ја со тупаници. По нејзиниот пад на подот, тој продолжил да ја стега за вратот сè додека не престанала да дише. Жената починала од задушување и прекин на дотокот на крв во мозокот.
Откако се уверил дека жртвата не покажува знаци на живот, обвинетиот го напуштил местото на настанот и самиот се пријавил во полицијата.
Јавниот обвинител до Основниот суд во Штип поднесе и предлог за продолжување на притворот за обвинетиот, кој останува во притвор до завршување на судската постапка.
