Хрватскиот уред за сузбивање на корупцијата и организираниот криминал денеска го уапси министерот за здравство Вили Берош како дел од голема акција против корупцијата. Премиерот Андреј Пленковиќ веднаш го разреши од функцијата, изразувајќи згрозеност од настаните.
„Не сум запознат со деталите, но очигледно станува збор за кривични дела поврзани со корупција. Ова е чин на предавство кон граѓаните и државата. Целосно ја поддржувам истрагата,“ изјави Пленковиќ.
Европското јавно обвинителство објави дека акцијата е насочена против Берош и уште седум лица, меѓу кои се споменуваат контроверзниот бизнисмен Хрвоје Петрач и неговите синови, Новица и Никола. Петрач не е уапсен бидејќи моментално не се наоѓа во Хрватска. Берош се товари за земање мито од 75.000 евра во набавка на медицински апарати за три болници.
„Целта на криминалното здружување била манипулација со јавни набавки за осигурување на договори за медицински роботски апарати,“ соопшти Европското јавно обвинителство.
