Економскиот институт-Скопје денеска ќе означи почетокот на проектот „Идентификување на причините за долгорочната невработеност на постарите жени во Северна Македонија и Србија“, кој се реализира во рамки на програмата Visegrad+ Grants, (2xV4 + 2xWB6/EaP), како дел од повикот за акциски грантови за 2024 година, во областа на јавна политика и институционални партнерства.
Проектот ќе трае до 31 март 2026 година, а во неговата реализација се вклучени четири високообразовни и научни институции, од четири европски држави: Економски институт-Скопје, единица на УКИМ, Северна Македонија; Институт за економски науки од Белград, Србија; Институт за економски истражувања на Академијата на науки од Словачка и Универзитет за информациски технологии и менаџмент од Рзесов, Полска.
Целта на проектот е да се идентификуваат причините кои ги спречуваат жените на возраст од 50 и повеќе години да најдат работа, соопшти Економски институт – Скопје. Вакво истражување ќе биде спроведено и во Србија, додека искуствата на Словачка и Полска ќе бидат искористени да се предложат решенија, мерки и политики со кои би се зголемила вработливоста на оваа категорија на жени. Истражувањето во проектот ќе биде насочено кон проблемите на долгорочно невработените жени стари 50 и повеќе години во Скопскиот и Белградскиот регион.
Проектот „Идентификување на причините за долгорочната невработеност на постарите жени во Северна Македонија и Србија“ нуди уникатна можност преку анкетен прашалник и фокус групи со дел од овие жени, пореално да се утврдат проблемите со кои се соочуваат невработените жени на возраст од 50 и повеќе години, причините за нивната долгорочна невработеност, идентификување на недостатокот на вештини, како и други релевантни аспекти кои би биле значајни за развој на соодветни стратегии, програми и мерки со кои би се овозможило ублажување на неповолната ситуација на овие жени. Тоа би го постигнале првенствено со нивно учество како корисници на овој проект, а потоа и преку зголемување на свесноста за проблемите и потребите на овие жени меѓу релевантните стеикхолдери, наведуваат од Економски институт – Скопје.
