Општина Центар го презакажа концертот „Нешто што ќе остане” кој првично беше одложен заради временските прилики. Новиот датум е 29 септември со почеток од 19 часот во Паркот на франкофонијата. Новата музичка приказна за центарци и за сите скопјани започна да се пишува минатиот октомври во рамките на Програмата за култура на Општината.
Градоначалникот Горан Герасимовски и овојпат најавува одлична забава со Влатко Лозаноски, Пајак, Лара, Таско, FIC & D’INVISIBLES и Сашко Коцев како водител на концертот.
„Жал ми е што првично моравме да го одложиме концертот но го направивме тоа заради непогодните временски прилики кои најавуваа нарушување на уживањето кое го планираме. Затоа сега повторно ве каниме сите следната недела на концерт на отворено во Паркот на франкофонијата. Јас како градоначалник на најурбаната општина во градот секогаш се стремам да ја подигнам културата на едно повисоко ниво, особено преку афирмирање на нашата домашна музика и македонските уметници. Во нашето секојдневје навистина недостасуваат културни и музички манифестации што бесплатно ќе бидат достапни за сите граѓани. Со „Нешто што ќе остане” Општина Центар дава свој придонес во негувањето на културните вредности. А за да ги негуваме истите Ве поканувам да дојдете на концертот за заедно да се дружиме и уживаме “, порачува Герасимовски.
Музичкиот хепенинг „Нешто што ќе остане” е новата приказна на Општина Центар што се реализира втора година и што ќе прерасне во традиција. Настанот е во целосна организација на Општина Центар за кој општината издвои 1.500.000 денари.
