Рибиното масло е богат извор на омега-3 масни киселини. За да откријат колкава заштита обезбедува, тим од истражувачи во Кина, САД, Велика Британија и Данска го следеа здравјето на повеќе од 400.000 учесници во Британија во период од 12 години за да ја проценат поврзаноста помеѓу додатоците од рибино масло и новите случаи на атријална фибрилација (неправилно чукање на срцето), срцев удар, мозочен удар и срцева слабост, како и смрт кај луѓе без дијагностицирани кардиоваскуларни болести.
Тие, исто така, оценуваа дали овие додатоци во исхраната влијаат на прогресијата на срцевите заболувања. Студијата објавена во списанието BMJ Medicine покажа дека за оние без дијагностицирани кардиоваскуларни болести на почетокот на периодот на следење, редовната употреба на додатоци од рибино масло е поврзана со 13% поголем ризик од развој на атријална фибрилација и 5% зголемен ризик на развој на мозочен удар.
Но, за пациентите со срцеви заболувања на почетокот на периодот на студијата, додатоците на рибино масло беа поврзани со 15% помал ризик од прогресија од атријална фибрилација до срцев удар и 9% помал ризик од прогресија од срцева слабост до смрт.
Ризикот здрави пациенти да доживеат срцев удар, мозочен удар или срцева слабост беше 6% поголем кај жените и 6% повисок кај непушачите. Имаше, исто така, поголем корисен ефект за постарите луѓе и мажите со постоечки срцеви заболувања, каде што ризикот од транзиција од добро здравје во смрт беше 11% и 7% помал, соодветно.
Ова беше набљудувачка студија, така што не може да се извлечат заклучоци за предизвикувачките фактори, предупредуваат авторите. Немаше достапни информации за дозата или формулацијата на додатоците за рибино масло.
Трејси Паркер, виш диететичар во Британската фондација за срце, рече: „Ова истражување не треба да ги загрижува луѓето кои редовно земаат додатоци од рибино масло, но исто така не е зелено светло да почнат да ги земаат за да се спречат болести на срцето и крвните садови.
„ Додатоци како што се омега-3 масните киселини не се замена за здрава исхрана и, наместо да се фокусирате на индивидуалните хранливи материи, важно е да ја гледате вашата исхрана како целина за да го намалите ризикот. Традиционалната медитеранска исхрана постојано е докажано дека го намалува ризикот од срцев или мозочен удар. Ова вклучува повеќе риба – бела и масна – и помалку црвено месо, заедно со многу овошје и зеленчук, грав, леќа, јаткасти плодови, семки и цели зрна“, заклучува Паркер.
