Британија ќе плати повеќе од 12,7 милијарди долари како компензација на илјадници пациенти во 1970-тите и 1980-тите кои биле лекувани со крв заразена со ХИВ или хепатитис Ц, објави во неделата Сандеј Тајмс.
Скандалот со употребата на контаминирана крв и крвни продукти се смета за една од најголемите грешки во третманот на пациентите во историјата на британската Национална здравствена служба, финансирана од државата. Се проценува дека околу 30.000 луѓе ја примиле контаминираната крв и дека околу 3.000 од нив починале како резултат на тоа.
Се верува дека уште повеќе пациенти се разболеле, но на некои од заразените никогаш не им се открила трагата.
Крв и крвни продукти, од кои некои беа увезени од Соединетите Американски Држави, беа дадени на пациенти на кои им требала трансфузија за време на операција и на оние кои страдаат од хемофилија. Сандеј тајмс пишува дека, пред утре да бидат објавени резултатите од официјалната независна истрага, британскиот премиер Риши Сунак официјално ќе се извини.
Владата потоа веќе во вторник ќе ги објави пакетите за обесштетување.
Мислам дека ова е најлошиот скандал во мојот живот, изјави министерот за финансии Џереми Хант за британскиот весник. „Исто така, мислам дека семејствата имаат апсолутно право да бидат крајно гневни затоа што генерации политичари, вклучително и јас кога бев министер за здравство, не дејствуваа доволно брзо за да го разрешат овој скандал.
Владата веќе плати 100.000 фунти како привремена компензација на некои жртви, вкупно 400 милиони фунти според препораките што следеа по истрагата во 2022 година.
