Во просториите на Вишото јавно обвинителство ќе биде сослушана и мајката на Дејан Драгијевиќ, осомничениот за убиството на девојчето Данка од Бањско Поље, пишува Курир.
Нејзиниот сопруг и син наводно му помогнале на Дејан да го скрие телото. Далибор Драгијевиќ почина во полициски притвор, додека на неговиот татко Радослав Драгијевиќ му е одреден истражен затвор.
Се уште не е познато каде се наоѓа телото на девојчето. Од Министерството за внатрешни работи на Србија, изјавија дека претресот на теренот е насочен кон оние локации каде што осомничените изјавиле дека го оставиле телото на Данка Илиќ. Сега конкретно се испитува коритото на Злоцка река. И натаму се пребарува Лазаровиот кањон во потрага по телото на Данка. Тоа е еден од најкомплексните подземни тунели во Србија. Во некои делови кањонот е длабок 500 метри, што го отежнува пребарувањето на и онака тешкиот терен.
