Гувернерот на руската област Белгород, која е цел на постојани напади од соседна Украина, денеска најави дека во наредните денови ќе бидат затворени трговските центри и училиштата во главниот град на тој регион, Белгород.
-Имајќи ја предвид моменталната ситуација, одлучивме трговските центри во Белгород да бидат затворени во недела и понеделник – изјави гувернерот Вјачеслав Гладков.
Гувернерот додаде дека училиштата исто така ќе останат затворени во понеделник и вторник во тој град и во осум области во регионот.
Тој објави дека двајца цивили загинале во украински артилериски напад на Белгород, а петмина се повредени денеска при удар на возило во селото Глотово, на околу два километри од украинската граница и дека напад на украинско беспилотно летало предизвикало пожар во нафтена рафинерија во регионот Самара.
Украинските напади на руската погранична територија следеа еден ден по рускиот напад на украинското пристаниште Одеса, каде загинаа 20 лица.
