Иран дополнително ги зголеми своите вкупни залихи ураниум, се вели во извештајот на Агенцијата за атомска енергија на Обединетите нации (МААЕ), пренесе Бета.
Доверливиот извештај укажува дека владата во Техеран продолжува да спречува неколку од најискусните инспектори на МААЕ да ја надгледуваат иранската нуклеарна програма.
Техеран, се додава, сè уште нема напредок во објаснувањето на вештачките честички на ураниум пронајдени на двете локации.
Во својот квартален извештај, МААЕ процени дека заклучно со 10 февруари, вкупните резерви на збогатен ураниум во Иран изнесуваат 5.525,5 килограми, што е зголемување за 1.038,7 килограми во споредба со последниот квартален извештај во ноември.
Се проценува дека Иран има 121,5 килограми ураниум збогатен до 60 проценти чистота, што претставува намалување за 6,8 килограми во споредба со последниот извештај од ноември 2023 година.
Намалувањето е резултат на тоа што Иран во последните недели разреди дел од својот 60 отсто збогатен ураниум со материјал од пониска класа.
Според дефиницијата на МААЕ, околу 42 килограми ураниум збогатен до 60 проценти е количината во која теоретски е можно создавање на едно атомско оружје.
Чистотата од 60 проценти е само краток, технички чекор до нивото од 90 проценти што се користи за нуклеарно оружје.
Помеѓу јуни и ноември минатата година, Иран го забави збогатувањето на три килограми месечно, но потоа повторно ја зголеми стапката на девет килограми на крајот на годината, објави МААЕ.
Според првичниот нуклеарен договор со светските сили во 2015 година, на Иран му беше дозволено да збогатува ураниум само до 3,67 проценти чистота, да одржува резерви на ураниум од 300 килограми и да користи само основни центрифуги за збогатување IR-1, во замена за ставање крај на економските санкции.
Инспекторите на ОН имаа задача да ја следат програмата.
Во 2018 година, тогашниот претседател Доналд Трамп еднострано ги повлече САД од договорот, велејќи дека ќе преговара за подобар договор, но тоа не се случи. Иран почна да ги крши условите од договорот една година подоцна.
Актуелниот американски претседател Џозеф Бајден изјави дека е подготвен повторно да влезе во нуклеарниот договор со Иран, но официјалните преговори за патната карта до таму пропаднаа во август 2022 година. Во меѓувреме, глобалните политички околности се сменија и тензиите на Блискиот Исток значително се зголемија, што ја прави нуклеарната дипломатија со Иран покомплицирана.
Иран долго време негираше дека некогаш сакал да развие нуклеарно оружје и продолжува да инсистира дека неговата нуклеарна програма е целосно за мирољубиви цели, како што се енергијата или медицината.
Сепак, генералниот директор на МААЕ минатата година предупреди дека Техеран има доволно збогатен ураниум за „неколку“ нуклеарни бомби – доколку одлучи да ги изгради.
