Мaж осомничен дека украл мал авион од аеродром во близина на Сан Франциско, а потоа го оставил на плажа во заливот Халф Мун, е обвинет за кражба на авион. Луиз Густаво Аирес (50) се изјаснил за невин на вчерашното рочиште, кое доби неочекуван пресврт кога тој побара сам да се застапува.
Судијата го одби барањето, пресудувајќи дека тој не е квалификуван да дејствува како свој адвокат. Аирес е притворен со кауција од 10.000 долари. Аирес, исто така, се соочува со три прекршочни пријави за поседување туѓа идентификација, откако властите пронајдоа кредитни картички и лични карти на други лица во неговиот ранец.
Обвиненијата доаѓаат помалку од една недела откако властите добија извештај во четвртокот навечер за мал авион кој слетал на плажа во заливот Халф Мун, мал град на брегот на Калифорнија јужно од Сан Франциско.
Кога полицајците пристигнале во областа, го нашле едномоторниот авион во чудна положба, но неоштетен и празен. Набрзо пронашле и привеле 50-годишен маж од Мајами кој одговарал на описот на лицето што се гледало како се оддалечува од авионот.
Властите велат дека авионот бил украден од аеродромот Пало Алто во близина на јужниот крај на заливот Сан Франциско. Според Федералната управа за авијација, авионот е регистриран на инструктор по летање во Пало Алто.
