Сите регистарски таблички од понеделник на себе мора да ја имаат ознаката НМК, а за оние што ја немаат обезбедни се налепници со кодот кои треба да се залепат на табличките.
Налепниците се бесплатни, но нема да можете едноставно да отидете и да ги земете и сами да ги залепите, туку за тоа постои процедура во МВР предводено од техничкиот министер Панче Тошковски.
За да добиете две најобични налепници вие со вашето возило ќе мора да отидете до станица за технички преглед, да пополните барање каде ќе ги внесете потребните податоци за вас и вашето возило, потоа да го доставите до шалтерот на МВР, за на крајот налепниците да бидат залепени ид страна на некој од контролорите во станицата за технички преглед.
Денес на две станици за технички преглед една во Аеродром и една во Ѓорче Петров се обидовме но не успеавме да дојдеме до налепници со кодот НМК.
Како што ни кажаа вработените во станиците, налепници добиле утрово, но дека со издавање ќе започнат во понеделник кога и ќе работат шалтерите на МВР.
Објаснувајќи ја целата процедура, вработените велат дека многу е веројатно дека во понеделник уште рано наутро ќе се случува метеж на нивните работни места, затоа што никој не знае на колку регистарски таблички треба да се залепат такви налепници, а покрај тоа ќе се вршат и редовни технички сервиси и регистрации на возила.
Од 12 февруари, сите регистарски таблички треба да бидат со кодот НМК
