Популистичкото мнозинство во Словачка во Парламентот ја изгласа контроверзната реформа на Кривичниот законик и покрај критиките од ЕУ, од словачката претседателка Зузана Чапутова и опозицијата, која го бојкотираше гласањето.
„За“ гласаа 78 пратеници од владејачката коалиција во 150-члениот Парламент.
Со новиот закон се предвидува намалување на казните за корупција и економски криминал. Исто така се намалува и рокот на застареност за одредени кривични дела, вклучително и силување, од 20 на 10 години. Од 20 март поголеми овластувања ќе има и главниот обвинител Марош Жилинка.
Чапутова веднаш го критикуваше новиот закон.
– Усвојувањето на амандманот на Кривичниот законик е лоша вест за Словачка и сите нејзини граѓани. Неприфатливо е вакви сериозни промени во криминалната политика на земјата да се вршат без соодветен законодавен процес, посочи Чапутова, додавајќи оти „ги разгледува сите можни опции за да го спречи стапувањето во сила на овој закон“.
Но, според Уставот на Словачка, претседателското вето може да биде отфрлено со просто мнозинство.
Против реформата се одржаа протести во Братислава и 15 словачки градови.
Портпаролот на Европска комисија минатиот месец изјави дека е побарано од словачката Влада да не ги прифаќа реформите и пред сè, да не прибегнува кон забрзана процедура без соодветни и длабински консултации со заинтересираните страни.
