Министерот за правда, Кренар Лога, заедно со претседателот на Анкетната комисија за заштита на човековите слободи и права, Халил Снопче, членот на Комисијата, Драгица Ѓавочанова , директорот на УИС, Јовица Стојановиќ, директорот на КПУ „Идризово“, Зоран Јовановски, и заменик-директорот Феми Јонузи, изврши увид и одблиску се запознаа со состојбата, условите во затворот, разговараше директно со затворениците и беше информиран за проблемите со кои се соочуваат.
„Мизерни, катастрофални и супстандардни услови за издржување на затворските казни, пренатрупаност, затвореници спијат на подот, нема соодветна здравствена заштита, нема соодветни санитарии, искршени кревети, мувлосани ѕидови. Овие услови докажуваат зошто ни е потребен итно закон за амнестија, со кој барем минимално ќе се растоварат капацитетите. Се работи за луѓе. И покрај извршените дела, тие се луѓе и заслужуваат достоинство. Наместо ресоцијализација и враќање во нормален живот, со ваков третман состојбата на овие лица може да се влоши уште повеќе“, вели Лога.
Апелира оваа состојба да не се злоупотреби за политички цели, а пратениците да покажат хуманост и да му дадат поддршка на законот за амнестија.
