Владата е подготвена да помогне жителите околу рудникот „Иловица“ на реферндум да се изјснат дали сакаат рудник. Вака денес на новинарско прашање одгвори вицепремиерот за економски прашања, Фатмир Битиќи, по посетата на компанијата „Сеавус“. Тој уште еднаш повтори дека ставот на Владата е да нема рудник ако граѓаните така се изјаснат и најави дека на утрешната владина седница ќе се одлучи за понатамошните чекори.
„Утре имаме седница на Владата, на која министерот Бектеши треба да реферира за сите судски и други правни постапки што се преземени за ‘Иловица’ од 2012 до денес. Откога ќе ги слушнеме сите моменти, ќе се знае кој е следниот чекор. Ние како Влада кажавме и ставот е јасен, ако граѓаните кажат дека не сакаат да има рудник, соодевтно ќе постапиме кон тоа. Мислам дека таму еднаш имало изјаснување на граѓаните, само во Босилово, ние сме спремни дури да помогнеме сите граѓани од целиот тој регион да се изјаснат. На рефрендум да кажат дали сакаат да има или не сакаат да има рудник во тој регион“, вели вицепремиерот Битиќи.
Тој немаше објаснување дали државата ќе треба да плаќа пенали доколку се постапи како што сакаат граѓаните, кои на неколку протести досега гласно кажаа дека не сакаат рудник.
Минатата недела додека премиерот даваше изјави дека ако граѓаните не сакаат, рудник нема да има, Министерството за економија на двочасовен брифинг пред новинарите објасни дека единствениот дополнителен документ, кој министерот Крешник Бектеши утре ќе го достави до Владата, е хронолошки приказ на сите ослуки и постапки во врска со „Иловица“, не од 2012 како што беше побарано од Владата, туку од 2006 година кога била потпишана првата од двете концесии, кои сега се споени. Министерството за економија објасни дека спојувањето на концесиите е само административна постапка, која нема да влијае на понатамошните барања што ќе ги имаат концесионерите.
