Повисоки плати за 5.000 денари до крајот на годината ќе добијат административците од Град Скопје. Советот на Скопје го прифати амандманот за зголемување на платите предложен од советничката група на СДСМ во рамки на ребалансот на буџетот.
Секретарот на Град Скопје, Зоран Глигоров го одби овој амандман, како и сите останати на денешната седница, но Советот го изгласа.
Согласно одлуката, од ставката привремени вработувања се одземаат 12 милиони денари кои се префрлаат во ставката основни плати. Со овие средства се обезбедуваат за 5000 денари повисоки плати за 470 вработени во градската администрација, без јавните претпријатија и противпожарната служба.
Советот на Скопје на денешната сеница изгласа ребаланс на буџетот кој сега изнесува 7 милијарди 503 милиони денари, односно зголемен е за 408 милиони 699 илјади денари.
