На територијата на Црна Гора е прогласен црвен метео аларм бидејќи од денеска територијата на таа земја ќе биде под силно влијание на топол тропски бран.
Во некои делови се очекуваат високи тропски температури на воздухот и над 40 Целзиусови степени.
Како што најавуваат од Институтот за хидрометеорологија во Црна Гора, температурите на воздухот ќе бидат значително над просекот за овој период од годината, а на места се очекува уривање на дневните температурни рекорди. Во најтоплите делови на поширокото подрачје на Подгорица и Даниловград се очекува температурата на воздухот да достигне и да надмине 40 степени.
Температури над 40 степени се најавени во подрачјето на Подгорица и Даниловград. Дирекцијата за заштита и спасување на Црна Гора упати предупредување до сите учесници во системот за заштита и спасување и укажа на потребата од зголемување на оперативната подготвеност.
„Оваа метеоролошка состојба, меѓу другото, во наредните денови ќе предизвика интензивно сушење на површината и ниска вегетација и со тоа ќе создаде многу висок до исклучително висок индекс на опасност од пожар, што укажува на многу висок до исклучително висок ризик од пожар (шумски пожар) на отворен простор (FWI околу 50-60)“, се наведува во предупредувањето.
