Шест лица загинаа откако утрово авион се урна и се запали над поле во јужната американска држава Калифорнија.
Авионот се запалил заедно со околу еден хектар вегетација пред да пристигнат пожарникарите, јавува Асошиејтед прес.
Авионот „Цесна Ц550“ што полета од меѓународниот аеродром Хари Рид во Лас Вегас се урна во близина на аеродромот во градот Муриета, во округот Риверсајд во југозападна Калифорнија, меѓу Лос Анџелес и Сан Диего, соопшти Федералната управа за авијација (ФАА).
Шест патници во авионот беа прогласени за мртви на местото на настанот, набргу откако властите го пронајдоа запалениот авион, соопшти пожарникарската служба на округот Риверсајд. Идентитетот на загинатите патници не е соопштен.
Националниот одбор за безбедност на транспортот и ФАА ја истражуваат несреќата.
Според АП, ова е втора трагична несреќа во близина на аеродромот Француска долина во округот Риверсајд, откако во вторникот авион удри во зграда до аеродромот, при што загина едно лице, а три други беа повредени.
