Германската економија повторно се спушти на ниво на пандемијата и во моментов нема знаци на системско закрепнување, предупреди Индустриската и трговската комора (ДИХК).
„Германија е во рецесија. Ние сме една од ретките европски земји чија економија повторно падна под нивото што го забележавме пред пандемијата. Ова е сигнал за тревога“, рече шефот на ДИХК, Питер Адријан.
Ситуацијата во германската економија е генерално тешка, рече Адријан, истакнувајќи ги проблемите меѓу компаниите и неподготвеноста да инвестираат. Тој предупреди дека се уште нема знаци за системско закрепнување, прогнозирајќи голем пад на градежниот сектор во втората половина од годината поради зголемените камати и скапите градежни материјали.
„Тоа ќе предизвика негативни последици во целата економија“, смета тој.
„Не се осмелувам да прогнозирам кога работите ќе почнат повторно да одат во нагорна линија. Веројатно ќе бидеме среќни ако на крајот на годината видиме нулта стапка на економски раст, а не минус. Но, тоа во најдобар случај значи стагнација“, потсети тој. Неопходен е огромен напредок за да се обезбеди просперитет на Германија, предупреди Адријан.
Германските компании се погодени од неизвесност, а како пример ја наведуваат транзицијата кон зелената енергија. Компаниите не знаат каква улога ќе има гасот во транзицијата кон обновливите извори на енергија, додека не станат подостапни залихите на енергија, рече тој. „Сè уште немаме зелен водород или сигурно и евтино снабдување со зелена струја за компаниите“, објасни првиот човек на ДИХК.
Германија би можела да заостане уште повеќе зад меѓународната конкуренција и веќе е меѓу земјите на ЕУ со најслаби економски резултати, додаде тој. Германските компании често бараат локации надвор од Европа, во САД, Јужна Америка и Азија, главно за да ги намалат трошоците, нагласи тој, порачувајќи им на претставниците во Бундестагот да се грижат за овој тренд.
„Долгорочно, ова води кон постепено иселување на компаниите, што, се разбира, влијае на работните места во Германија. Затоа што би можеле да ги изгубиме засекогаш“, нагласи Адријан.
