Гилермо Сонлајн, еден од основачите на „ОкеанГејт“ (OceanGate), ги отфрли критиките упатени кон компанијата во врска со безбедноста и сертификацијата.
Сонлајн ја напуштил компанијата пред 10 години, но сè уште има малцински удел во фирмата.
Тој на програмата „Тудеј“ на Би-Би-Си Радио 4, рече дека оние кои коментираат за безбедноста на „Титан“, вклучително и режисерот Џејмс Камерон, не биле целосно информирани.
„Секој експерт кој размислува за ова, вклучително и г-дин Камерон, исто така ќе признае дека не биле таму за дизајнот, инженерството и изградбата на подморницата и секако не за ригорозната програма која траеше 14 години за тестирање на „Титан““, рече Сонлајн.
„Ова е трагична загуба за заедницата за истражување на океаните, но секој што работи во длабокиот океан, го знае ризикот да работи под таков притисок и дека во секој момент има ризик од ваков вид на имплозија“, додаде Сонлајн.
Тој смета дека технологијата и иновациите можат да ги надминат регулативите и дека програмерите се во подобра позиција да ги разберат ризиците и најдобро да ги минимизираат.
