Прилепската фабриката за текстилни производи „Тила“ во Прилеп објави фотографии по големиот пожар што ги зафати пред еден месец, а во која изгоре сè.
„Под ведро небо, целосно разрушени. Останаа само голи ѕидови и црна пепел, која ја дишеме секој ден поминат тука меѓу овие ѕидови обидувајќи се да го вратиме она што го изгубивме. Пожарот однесе сè, само не и нашите волја и надеж за подобро утре! Ќе ѝ возвратиме на судбината со уште поголеми сили и ќе направиме сè за да си го вратиме она што ни припаѓа само нам и вам, а тоа е нашата иднина, нашата и ваша ТИЛА! Ви благодариме уште еднаш на сите за поддршката што ни ја давате“, пишува во објавата.
Пожарот се гаснеше половина ден со оглед на запаливите материјали.
Брендот „Тила“ е дело и креација на две сестри, кои со помош на нивната семејна компанија, конфекцијата „Хатра“ во Прилеп, почнуваат со креирање и менаџирање на компанијата уште во своите рани дваесетти години. Брендот „Тила“ постои веќе 15 години и со години беше и е единствен македонски бренд на детска облека, кој функционира професионално од типот на дизајнерските брендови.
