Не постои држава која требала да донесе помачни одлуки од нас за да стане членка на ЕУ и НАТО, изјави премиерот Димитар Ковачевски на Форумот на ГЛОБСЕК 2023 во Братислава.
Прашан за исполнувањето на критериумите за членството во ЕУ, Ковачевски кажа дека кога станува збор за пристапувањето сите говоревме за Копенхагеншките критериуми, но тие се веќе можеби заборавени.
„Што Северна Македонија требаше да направи за да стане членка на НАТО и ЕУ? Ако постои држава што требала да донесе помачни одлуки од нас, не знам. Го сменивме името за да станеме членка. И кога се заврши со тоа, НАТО испорача, ЕУ не. Тоа се факти. Затоа што измислија некакво вето поради владењето на правото и некои други работи“, рече Ковачевски.
Тој кажа и дека не би се согласил оти сите земји што се приклучле кон ЕУ во тој момент биле на ниво на Франција или Шведска во поглед на интегритет, владеење на право и демократија.
Додаде дека Северна Македонија спроведе тешки реформи, а Европскиот Совет треба да има јасна стратегија за интеграција на Балканот.
