Претседателот на Владата на Република Северна Македонија, Димитар Ковачевски се сретна со Петра Дрекслер, амбасадорка на Сојузна Република Германија во земјава.
Премиерот Ковачевски посака топло добредојде на новата германска амбасадорка Дрекслер, пришто од двете страни се изразени определби за натамошен активен развој на македонско-германското партнерство коешто е долгогодишно и силно и годинава се заокружува во 30-годишнина од воспоставувањето дипломатски односи.
На состанокот е разговарано за повеќе актуелни прашања од значење за нашата држава и регионот, за унапредувањето на одличната економска соработка меѓу Северна Македонија и Германија и за предизвиците во европскиот и геополитички контекст.
Пренесена е јасна германска поддршка за следниот чекор во европските интеграции на нашата земја. Воедно, беше посочено дека за европската перспектива на Северна Македонија се потребни заложбите и поддршката од сите политички чинители во државата. Беше констатирано дека евроатлантскиот развој на Република Северна Македонија е фактор за стабилност за целиот регион и за Европа.
Премиерот Ковачевски се заблагодари за тоа што Германија е важен партнер на Северна Македонија од воспоставената независност, сојузник во НАТО, ОН и ОБСЕ, еден од најсилните поддржувачи на нашата интеграција во Европската Унија и на економски план, прв трговски партнер во последните години, со најголем обем на тргување минатата година, од околу пет милијарди евра, петти странски директен инвеститор и еден од најголемите билатерални развојни партнери на Северна Македонија.
„Со активната и континуирана поддршка на Германија, која доби на дополнително значење за време на германското претседателство со ЕУ во 2020 година, направивме историски чекор напред во евроинтеграциите, по 17 годишен статус кво како земја кандидатка и ги започнавме преговорите за пристапување во Унијата лани во јули. Од исклучително значење се и денешната поддршка и охрабрување коишто ги добиваме од Германија за продолжување на европските интеграции. Германија е пријателска држава којашто е високо ценета од нашите граѓани. Како Влада ќе ги преземеме сите потребни политички чекори да ја осигураме европската иднина“, рече премиерот Ковачевски.
На состанокот е нагласено значењето на Берлинскиот процес, како основна и сеопфатна движечка сила на регионалната соработка на највисоко ниво во делот на воспоставувањето заеднички регионален пазар на Западен Балкан и на Зелената агенда и е истакната улогата на Република Северна Македонија како промотор на дијалогот и културата на дијалог во регионот.
