Генералниот делегат на Канскиот филмски фестивал застана во одбрана на одлуката престижното отворање на фестивалот да му се додели на филмот „Жана де Бари“, во кој Џони Деп го глуми Луј Петнаесетти.
Почеста за „Жана де Бари“, односно одлуката овој филм да го отвори фестивалот во Кан следниот месец, наиде на критики, но генералниот делегат Тиери Фремо вели дека тоа не е контроверзен избор.
Режиран од Мајвен, која исто така ја има и главната улога, Jeanne du Barry е биографски филм за познатата миленичка на кралот Луј XV, погубена во 1793 година за време на Француската револуција.
Во интервју за „Вараети“, Фремо рече: „Воопшто не е контроверзен избор. Ако на Џони Деп му беше забрането да работи, ќе беше поинаку, но тоа не е така. Знаеме само едно, тоа е правосудниот систем и мислам дека тој го доби правниот случај“.
За потсетување, Деп извојува победа во судењето за клевета против поранешната сопруга Амбер Херд, а во кој двјцата изнесоа обвинувања еден против друг.
