Политичката партија Левица е иста како ВМРО-ДПМНЕ, се восхитува на авторитарни режими и сака да ја види државата во изолација, велат од СДСМ откога партијата оддаде почит на гробот на албанскиот државник Енвер Хоџа.
Според СДСМ, оддавањето почит на партиска делегација е само потсетник за тоа колку оваа партија е радикално вљубена во режим.
„Левицата е иста како ВМРО-ДПМНЕ. Воспева тоталитаристички лидер, кој својата земја со децении ја има затворено, уназадено и меѓународно изолирано. Левицата е радикална партија поддржувач на авторитарни режими и во тоа е иста како ВМРО-ДПМНЕ, партијата што и сама имаше инсталирано режим во нашата држава.
ВМРО-ДПМНЕ и Левицата се лицето и опачината на ретроградните елементи на политичката сцена во Македонија. Затоа се единствените што се против европската иднина на државата и затоа секојдневно се натпреваруваат во тоа кој ќе има порадикални и поекстремни ставови. Поради таквиот меѓусебен однос, Христијан Мицкоски ја доведува ВМРО-ДПМНЕ во заложништво на Апасиев и Левицата“, велат од СДСМ.
