Британската разузнавачка служба објави дека Русите најверојатно го освоиле центарот на Бахмут и дека сега се загрозени патиштата за снабдување на украинските сили на запад.
Источниот град е една од последните урбани области на Доњецк што ја издржа руската инвазија. Сега главно претворен во урнатини, центарот на градот е во фокусот на интензивните борби со месеци, пренесе „Б92“
„Клучната украинска рута за снабдување 0506 западно од градот најверојатно ќе биде сериозно загрозена“, предупреди британското разузнавање.
Украинскиот воен експерт Владислав Селезњов претходно изјави дека силите ќе мора да се повлечат доколку способноста за испорака на војската биде дополнително загрозена.
„Ситуацијата е тешка, непријателот концентрира максимални напори за да го заземе Бахмут. Сепак, Украина претрпува сериозни загуби и не постигнува стратешки успех“, изјави за Ројтерс портпаролот на Источната воена команда Сергеј Череватиј.
Претходно оваа недела, Череватиј ги отфрли тврдењата на Кремљ дека подигнал руско знаме над една од административните згради на Бахмут.
„Тие кренаа знаме над некој вид тоалет. Го закачија на којзнае што, ја закачија својата ткаенина и рекоа дека го зазеле градот. Па, нека мислат дека го зазеле“, изјави тој за Ројтерс по телефон.
