Поранешниот американски претседател Доналд Трамп повеќе не е недопирлив, изјави порно ѕвездата Сторми Даниелс во петокот вечерта во своето прво интервју откако големата порота на Менхетен го обвини. Даниелс изјави за лондонски „Тајмс“ дека забележала дека луѓето реагираат поинаку на обвинението отколку пред неколку години, кога беа објавени првите извештаи во печатот за нејзината сексуална средба со Трамп.
„ На почетокот тоа беше како „спонзоруша, курва, лажливка“… Во тој стил“, рече Даниелс. „ А овој пат е „Ќе те убијам“, рече таа.
Големата порота гласаше да го обвини Трамп по неколку месеци сослушување докази за исплата на 130.000 долари на Сторми Даниелс во последните денови од кампањата во 2016 година.
Парите биле наменети да го купат нејзиниот молк за сексуалната врска за која вели дека ја имале години пред тоа. Трамп го негираше тврдењето на Даниелс, а неговиот адвокат ја обвини Даниелс, чие вистинско име е Стефани Клифорд, за изнуда. Даниелс изјавила дека кога ја слушнала веста за обвинението, била излезена јавајќи го својот коњ.
„ Има нешто навистина иронично и урнебесно во тоа што дознав за обвинението додека јавав на мојот коњ наречен Redemption – Искупување“, рече таа и додаде дека дел од 130.000 долари што ги добила тајно искористила за да купи приколка за коњот.
Таа вели дека не се плаши од идејата да се соочи со Трамп на суд бидејќи го видела гол и „нема шанси да биде пострашен со облеката на себе“. Но, таа ја чувствува сериозноста на ситуацијата и можната опасност. „ Каков и да е исходот, ќе има насилство, ќе има и повредени и смртни случаи“, рече Даниелс.
„ Постои можност од ова да произлезе многу добро. Но, во секој случај, и многу лошо ќе произлезе“, рече Даниелс.
